Det er Jon Fosse som har skrive manuset til filmen «Kjærast", der Erik Poppe har regi og Stadlandet, Hoddevika og Selje dannar den storslåtte og dramatiske ramma rundt delar av filmen. No skal resultatet visast nettopp her, i landskapet som har vore med på å gi historia liv og uttrykk!

Inviterer til minglefest og festframsyning 8. september

Denne dagen blir det både minglefest og festframsyning for innbyggjarane i Stad kommune, og regissør Erik Poppe og hovudrolleinnehavarane Leo Magnus de la Nuez og Kristi-Helene Giæver Engeberg vil vere på plass for å møte publikum.

– Det er ei stor glede å få ønskje Erik Poppe, skodespelarane og resten av laget bak «Kjærast» velkomne tilbake til Stad. Vi er stolte over at Stadlandet, Hoddevika og Selje er valde som scene for denne sterke historia. Landskapet vårt har ei eiga kraft, og i denne filmen får det spele ei viktig rolle, seier ordførar Judith Kvåle.

Det blir to festframsyningar i Selje denne kvelden, kl. 18.15 og 20.45. Mellom framsyningane (kl. 20.15-20.45) blir det samtalar med regissør og skodespelarar der publikum kan høyre meir om historia, innspelinga og møtet med det særmerkte landskapet på Stadlandet/Selje. Alle med billettar til ei av framsyningane er velkomen til å delta også på dette.

Filmfesten startar allereie klokka 16.00 med open minglefest på Stad Hotell. Alle som ønskjer, er inviterte til å vere med på den uformelle samlinga i forkant av kinoframsyningane. Her blir det høve til å møtast, kjenne på forventningane og saman markere at «Kjærast» kjem tilbake til ein av stadane der filmen vart spelt inn.

– Stad hotell har vore base for filmteamet under innspelinga. Det er svært kjekt at dei ønskjer å komme tilbake og dele feiringa av den ferdige filmen saman med oss, lokalbefolkninga og publikum. Vi håper mange tek turen innom, seier Marita Ervik marknadsansvarleg ved Stad Hotell. 

For dei som ønskjer blir det sett opp gratis busstransport frå Stad Hotell til festframsyninga i Selje, med retur til Leikanger etter filmsamtalen.

Jon Fosses einaste originalskrivne spelefilmmanus

«Kjærast» byggjer på Nobelprisvinnar Jon Fosses einaste originalskrivne manus for spelefilm. Manuset vart skrive på slutten av 1990-talet og er ikkje basert på nokon av dei litterære eller dramatiske utgivingane hans.

Filmen fortel historia om Asle og Gerd, som finn kvarandre i ein liten kystby lengst vest mot havet. Dei får ein son, og ei stund er lykka fullkommen. Men Asle er sjømann og søkjer seg bort, medan Gerd blir att åleine med barnet. Avstanden mellom dei veks, og filmen stiller spørsmålet: Kor mykje avstand toler kjærleiken?

I Fosses særeigne og minimalistiske stil blir mykje formidla gjennom blikk, stillheit, knapp dialog og det vakre, men nådelause kystlandskapet.

Jon Fosse, fødd i 1959, blir rekna som ein av dei viktigaste forfattarane i vår tid. Han har gjennom meir enn 40 år skrive romanar, dramatikk, lyrikk, kortprosa, essay og barnebøker. Tekstane hans er omsette til ei lang rekkje språk, og skodespela er sette opp over heile verda. I 2023 fekk han Nobelprisen i litteratur. Med «Kjærast» møter publikum Fosse sitt univers i ei historie skriven direkte for det store lerretet.

Ei historie om nærleik og håp

Erik Poppe er ein av Noregs mest anerkjende filmregissørar. Han har mellom anna regissert «Kongens nei», «Utøya 22. juli» og «Quislings siste dager». I arbeidet med «Kjærast» har han teke utgangspunkt i Fosses knappe og poetiske filmspråk og det dramatiske landskapet på Vestlandet.

Han har omtalt «Kjærast» som ei kjærleikshistorie full av det usagde, ømheit og mystikk – og som ei open dør inn til Jon Fosse sitt univers for dei som enno ikkje kjenner forfattarskapen hans.

«Kjærast» opna Den norske filmfestivalen i Haugesund søndag 23. august og har ordinær norsk kinopremiere 18. september. 

Stadlandet som filmkulisse

«Kjærast» er ein av fleire norske og internasjonale filmproduksjonar som har valt det særmerkte landskapet på Stadlandet som kulisse. Det opne havet, dei bratte fjella, sandstrendene, kulturlandskapet og det skiftande lyset gjer området attraktivt for film-, fjernsyns- og reklameproduksjonar.

– At stadig fleire får auge på Stadlandet som innspelingsstad, gir oss verdifull merksemd langt utover kommunegrensene. Film kan skape interesse for staden, styrkje reiselivet og gi grunnlag for lokal verdiskaping. Dette ønskjer vi velkome – samstundes må utviklinga skje på ein måte som tek vare på naturen, kulturlandskapet og lokalsamfunna som gjer Stad så særmerkt, avsluttar ordførar Judith Kvåle.

Poppe på skulebesøk på Eid vidaregåande

Måndag 7. september blir det ei eiga skuleframsyning av «Kjærast» for elevane ved Eid vidaregåande skule. Framsyninga blir gjennomført i samarbeid med Stad kino og gir ungdommane eit nært møte med filmen, Jon Fosse sitt univers og arbeidet med å skape ei filmforteljing.

Tysdag 8. september, kjem regissør Erik Poppe til skulen for å møte elevane og samtale om filmen. Dei vil då få høve til å stille spørsmål og høyre Poppe fortelje om arbeidet med manuset, innspelinga og dei kunstnarlege vala bak filmen.

Gir elevane fleire vegar inn i Fosse sitt univers

Stad bibliotek, som driv skulebiblioteket ved Eid vidaregåande skule, kjøper no inn meir litteratur av Jon Fosse til bruk i norskundervisninga ved skulen. Når «Kjærast» no kjem i bokform, kjøper biblioteket også inn eit klassesett som elevane kan arbeide med saman med filmen.

– Jon Fosse er nobelprisvinnar og ein av dei viktigaste norske forfattarane i vår tid, og har ein sjølvsagd plass i norsk litteratur og i norskundervisninga. Når elevane får møte «Kjærast» både som bok og film, kan dei utforske den same forteljinga gjennom to ulike uttrykk. Det gir eit godt utgangspunkt for å sjå nærare på korleis tekst, filmspråk, skodespel og landskap verkar saman – og ekstra kjekt at ein del av det også er «vårt», seier biblioteksjef Janne Mari Hjelle ved Stad bibliotek.

Program 8. september

Dagtid 7. september: Skulekino, framsyning for elevar ved Eid vgs
Dagtid 8. september Regissør Erik Poppe besøker Eid vgs for samtale med elevane. 
Kl. 16.00: Minglefest på Stad Hotell – ope for alle
Kl. 18.15: Første festframsyning, samfunnshuset i Selje
Kl. 20.15: Samtalar med regissør og skodespelarar (for begge framsyningar)
Kl. 20.45: Andre festframsyning

Billettane er for frå 25. august på www.bygdekinoen.no.

Filmfesten er eit samskapingsprosjekt mellom Stad kommune, Bygdekinoen, Venner av Selje Samfunnshus, Stad Hotell og produksjonsselskapet Paradox.

Filmanmeldelse NRK: Lodder store dyp - NRK