Bakgrunn

I samsvar med §§ 12-3 og 12-8 i plan- og bygningslova (pbl.) vert det med dette varsla oppstart av arbeid med endring av tre detaljreguleringsplanar i Stad kommune, der føremålet med planarbeida er å justere nokre av dei planlagde løysingane for utbygging av Stad skipstunnel. 

Aktuelle reguleringsplanar som er føremål for reguleringsendring er:

• Stad skipstunnel                 (planid. 2022010)
• Lesto næringsområde         (planid. 2022014)
• Kjøde næringsområde         (planid. 2022013)

Kystverket er forslagsstillar og ansvarleg for planarbeidet, i samarbeid med Stad kommune, jf. pbl. § 3-7. COWI AS er forslagsstillar sin konsulent.

Dei tre gjeldande reguleringsplanane i området gjev samla ei heilskapleg løysing og legg til rette for utbygginga av skipstunnelen med mellom anna tilhøyrande anlegg, anleggstunnel, nytt næringsområde i Moldefjorden og større hamneareal med bruk av massar som vert tekne ut ved bygginga av tunnelen. 

Den planlagde skipstunnelen ligg i Stad kommune, heilt nord i Vestland fylke, og grensar til Vanylven kommune i Møre og Romsdal. Tunnelen er planlagd ført mellom Kjødspollen i aust og Moldefjorden i vest, ved den smalaste delen av Stadlandet.

Målet med prosjektet er å sikre tryggare seglas, og meir føreseieleg regularitet for skipstrafikken forbi Stad.

Føremålet med planarbeida

Føremålet med desse planendringane er i hovudsak å leggje til rette for alternative løysingar for plassering av tunnelmassar og matjord, og justering av gang- og sykkelveg til tursti.

Dei tre gjeldande reguleringsplanane og oversikt over endringane

1. Stad skipstunnel, planid. 2022010
Sist vedteken 24.10.2024

Området er i dag regulert til sjølve tunnelen, portalane, tilhøyrande sideareal, anleggsområde og anleggstunnel. Planen gjev hamneareal og småbåthamn, og det er opna for fritids- og turistføremål i tillegg til vegutbetring.

Endringane vil leggje til rette for mogleg auka massedeponi i sjøen, sør for tunnelinngangen på Moldefjordsida. I tillegg vert det mellom anna lagd opp til å innarbeide allereie godkjente endringar frå administrativt endringsvedtak, utvide plangrensa i sjøen mot sør og vest, utvide plangrensa noko på land mot sør, auka potensial for større fyllingsvolum og med det utviding av planlagd fylling, tilrettelegging for alternativ anleggstunnel og endring av gang- og sykkelveg over portal i Kjødspollen til sti. 

Figuren over viser omriss av gjeldande reguleringsplan på Moldefjordsida med raud stipla linje, og forslag til ny, utvida plangrense er vist med svart farge. Figuren under viser same tilhøve på Kjødspollensida

Varslingsgrense Stad skipstunnel Kjødepollen (PDF, 3 MB)Varslingsgrense Stad skipstunnel Kjødepollen med regplan (PDF, 3 MB)
Varslingsgrense Stad skipstunnel Kjødepollen, samanlikning (PDF, 2 MB)

Lenke til gjeldande reguleringsplan: https://arealplaner.no/stad4649/arealplaner/271

2. Lesto næringsområde, planid. 2022014
Sist vedteken 24.10.2024

Området er i dag regulert til mellom anna nytt næringsområde og hamneområde, mellombelse anleggsområde for utbygging av skipstunnelen, utbetring av kryss og diverse utbyggingsføremål i samsvar med gjeldande arealbruk, i tillegg til LNF-område (landbruk-, natur- og friluftsområde).  

Endringane gjeld i hovudsak utviding av fylling mot søraust, noko utviding av landareal i sjøen, tilrettelegging for betre rassikring og tilrettelegging for eventuell mellombels steinlager på sjøfylling.

Planavgrensinga for reguleringsplanendringa er same som for gjeldande reguleringsplan for Lesto næringspark.

Varslingsgrense Lesto (PDF, 2 MB)
Varslingsgrense Lesto med regplanendring (PDF, 3 MB)

Lenke til gjeldande reguleringsplan: https://arealplaner.no/stad4649/arealplaner/275

3. Kjøde næringsområde, planid. 2022013
Sist vedteken 24.10.2024.

Området er i dag regulert til mottak av massar frå skipstunnelen, og for å leggje til rette for etablering av nye næringsområde og anleggsområde på areal som er fylt ut med lausmassar frå anleggsarbeida. I tillegg opnar planen for eksisterande arealbruk, som LNF-område og hamneområde i sjøen/kai.

Endringane gjeld i hovudsak tilrettelegging for rassikring på sjøfylling med sikringsvoll, tilrettelegging for eventuell mellombels steinlager på sjøfylling og på område sør for fylkesvegen. I tillegg er det ønskje om å utvide planområdet på land mot nordvest for å sikre areal for mellombels lagring av matjord. Det må også vurderast løysingar for å forenkle krava til opparbeiding av rasteplass.

Figuren over viser omriss av gjeldande reguleringsplan med raud stipla linje, og forslag til ny, utvida plangrense er vist med svart farge. Ny planavgrensing viser noko utviding i vest, men er elles same som for gjeldande reguleringsplan for Kjøde næringspark.

Varslingsgrense Kjøde (PDF, 2 MB)
Varslingsgrense Kjøde med regplan (PDF, 2 MB)
 

Lenke til gjeldande reguleringsplan: https://arealplaner.no/stad4649/arealplaner/274 

Vurdering av krav om konsekvensutgreiing

Det er vurdert at planarbeidet ikkje utløyser krav om nye konsekvensutgreiingar for forhold som allereie har blitt avklarte i tidlegare reguleringsplanprosessar, jf. forskrift om konsekvensutgreiingar § 6 første ledd bokstav b og § 8 første ledd bokstav a. Grunngjevinga er at dei areala som vert omfatta av endringane i stor grad allereie har blitt vurderte i samband med utarbeiding av gjeldande reguleringsplanar. 

Det er likevel vurdert at det er behov for nokre tilleggsutgreiingar for å avklare verknadene av dei nye tiltaka som følgjer av planendringane. Dette gjeld mellom anna: supplerande geotekniske undersøkingar og skredvurderingar for utvida sjøfyllingar, utgreiing av støykonsekvensar av utvida anleggsområde, vurdering av marin natur og marint vassmiljø, inklusive påverknad av undervass-støy, vurdering av terrestrisk natur og botndyr i bekk og økosystemtenester og vurdering av landskapsverknader. I tillegg kjem dei ordinære vurderingane for reguleringsplanarbeid som mellom anna er knytt til friluftsliv, vurdering av verknader for matjord/landbruk og kulturmiljø og kulturminne.

Innspel og merknader

Det er berre endringane som følgjer av dette planarbeidet, og verknadene av desse som er gjenstand for vidare sakshandsaming. Forhold som allereie er avklarte og vedtekne i dei tre gjeldande reguleringsplanane, og som ikkje vert omfatta av endringane, vil ikkje vere gjenstand for ny høyring. Dei vert ståande slik dei allereie er godkjente. 

Eventuelle spørsmål om planarbeidet kan rettast til COWI AS v/Espen Viddal, tlf. 901 77 104, e-post: esvi@cowi.com 

Eventuelle innspel og merknader til varsel om oppstart av reguleringsendringane skal sendast på e-post til aaae@cowi.com, eller som brev til COWI AS v/Åse Aleheim, Kvaløygata 3, 5537 Haugesund, 

innan søndag 10. mai 2026. Merk innsendinga med kva plan uttalen gjeld.

Det er til orientering sendt varslingsbrev til grunneigarar, naboar og offentlege høyringsinstansar og interesseorganisasjonar, og saka er annonsert i lokalavisa Fjordenes Tidende. 

Kontordag 20. april kl. 9.00-12.30:

I samband med oppstartsvarslinga inviterer Kystverket og kommunen til kontordag for dei som ønskjer meir informasjon som grunnlag for å kome med innspel og merknader til planarbeidet. Kontordagen vert halden på kommunehuset i Selje. 

For avtale om tidspunkt for besøk på kontordagen, ta kontakt med Plan og forvaltning på telefon 979 90 422

Adresse: Kommunehuset i Selje, Nabben 80, 6740 Selje

Det vert gjort merksam på at det vil bli høve til å få meir informasjon og at ein kan kome med konkrete merknader når sjølve planforslaget vert lagt ut på høyring seinare i år.