Kjære førsteklassing 
– velkomen til din aller første skuledag
 

I dag er ein merkedag. Ein dag du kanskje har gleda deg til, eller grua deg litt til. Kanskje begge delar. Å byrje på skulen er stort – for deg, for dei som står deg nær, og for oss som får vere med på reisa di.

Du kjem med nysgjerrigheit, med spørsmål, med forventningar – og kanskje med ei lita uro. Det er heilt normalt. Skulen er ein ny stad, med nye menneske og nye opplevingar. Men du skal vite: du er velkomen akkurat slik du er.

Kjære foreldre og føresette – i dag slepp de barnet dykkar inn i ei ny verd. Det krev mot og tillit. Dykkar del er på langt nær over, men no skal vi vere med å bidra. Vi skal sjå barnet dykkar, høyre det, støtte det og hjelpe det til å finne sin plass. I fellesskap skal vi skape trygge rammer for læring og vekst.

Kjære lærarar og tilsette – de har fått eit stort ansvar. De skal vere med på å forme framtida, eitt barn om gongen. Det krev både fagleg styrke og menneskeleg varme. Hugs at kvar elev kjem med sin eigen bagasje, sine eigne draumar og behov. Eg er trygg på at de møter dei med opne sinn og opne hjarte – eg veit det er viktig for dykk.

Kjære fellesskap – vi har alle eit ansvar. Skulen er ikkje berre ein bygning, men eit levande fellesskap der alle høyrer til. Lat oss vere rause med kvarandre. Lat oss inkludere, støtte og løfte – ikkje berre våre eigne, men alle barn. For det er i fellesskapet at tryggleik og trivsel veks.

Kjære du som sit her med ny sekk på ryggen og kanskje litt spente auge – du skal få lære mykje. Du skal få leike, undre deg, oppdage og utvikle deg. Du skal få vere deg sjølv, og du skal få bli kjent med andre. Nokre dagar vil vere lette, andre vil vere vanskelege – men du skal vite at du aldri er åleine.

Velkomen til skulen. Velkomen til fellesskapet. Velkomen til ei reise som berre har starta.

Med helsing 
Ordførar Judith Kvåle