Bakgrunn - nytt reinseanlegg på Nordfjordeid
Dagens reinseanlegg på Mel er eit eldre anlegg med avgrensa kapasitet og teknisk standard. Samtidig kjem det strengare nasjonale og europeiske krav til reinsing av avløpsvatn. Eit nytt reinseanlegg vil:
- gi betre reinsing og redusere utslepp til Eidsfjorden
- sikre tilstrekkeleg kapasitet for framtidig vekst
- gi ei meir driftssikker og moderne avløpsløysing
- betre arbeidsmiljøet for driftspersonell.
Les meir om EU sitt avløpsdirektiv her.
Dagens reinseanlegg på Mel, NordfjordeidReguleringsplanen er vedteken
Etter fleire år med planlegging, utgreiingar og medverknad vedtok Stad kommunestyre detaljregulering for Prestevika aust 12. mars 2026. Reguleringsplanen legg til rette for bygging av nytt hovudreinseanlegg med tilhøyrande teknisk infrastruktur.
I planarbeidet er det gjennomført omfattande fagutgreiingar innan mellom anna naturmangfald, marint miljø, geoteknikk, trafikk, lukt, klima, stormflo og landskap. Det har også vore lagt vekt på å redusere arealbruken, ta omsyn til nærmiljøet og sikre god arkitektonisk utforming.
Politiske føringar for prosjektet
Kommunestyret har tidlegare behandla forstudien om lokalisering av nytt reinseanlegg. I vedtaket vart det lagt til grunn at prosjektet skal utviklast vidare med vekt på ei kostnadseffektiv løysing, høg miljøstandard og god tilpassing til omgjevnadene. Kommunestyret bad også om vidare arbeid med optimalisering av prosjektet før gjennomføring.
Jamfør vedtakspunkt 8-9:
8. Sak knytt til utgreiing av to-trinns byggeprosjekt Nordfjordeid reinseanlegg vert lagt fram våren 2026 for handsaming.
9. Gjeldande reinseanlegg på Nordfjordeid. Det skal gjerast eit forstudie på plassering av reinseanlegg som tek opp i seg alle kjende innspel om er komne opp i saka, og vidare om bygging bør/kan skje i to trinn.
Politisk sak er utsett til september 2026.
Status i prosjektet
Prosjektet har no eit vedteke plangrunnlag for Prestevika og kan gå vidare til detaljprosjektering og førebuing av bygging, dersom dette blir aktuelt.
I samband med økonomiplanen vedtok kommunestyret å forskyve investeringa i nytt reinseanlegg på Nordfjordeid med eitt år. Utsetjinga er ei økonomisk prioritering og endrar ikkje målsettinga om å etablere eit nytt reinseanlegg. Prosjektet skal utviklast vidare i tråd med vedtekne planar og politiske føringar.
Vidare framdrift
Dei neste stega i prosjektet er:
- vidare arbeid vurdering av alternative, aktuelle lokasjonar
- endeleg avklaring lokasjon
- vidare detaljprosjektering
- førebuing av konkurransegrunnlag
- utlysing av entreprisar
- byggestart når finansiering og framdriftsplan ligg føre
- etablering av nytt reinseanlegg og tilhøyrande teknisk infrastruktur
Kommunen vil halde innbyggjarane orienterte om framdrifta etter kvart som prosjektet går vidare.
Eit viktig miljøløft for Nordfjordeid
Nytt reinseanlegg vil vere ei langsiktig investering i miljø, folkehelse og samfunnsutvikling. Prosjektet vil bidra til betre vassmiljø i Eidsfjorden, ei meir robust avløpsløysing og nødvendig kapasitet for framtidig utvikling av Nordfjordeid og Eidsdalen.
Lenke til temaplan for avløp
Temaplanar for vassforsyning, avløp og overvatn 2023-2034
Meir info - saker i prosessen
Lenke til arkivsak for detaljreguleringsplanarbeidet
Sak 2023/2429 Detaljregulering - Prestevika aust
Lenke til arkivsak med oppstart av planarbeid og innkomne merknader (høyringsperiode er over)
Sak 2023/2781 Offentleg høyring - Detaljregulering for Mel reinseanlegg - Varsel om oppstart