Måndag 8. juni inviterer Stad kommune til eit ope informasjons- og kunnskapsmøte om aldring og helse. Dette er ei samling for deg som er oppteken av livskvalitet, helse og gode omsorgstilbod i eldre år.
Helse- og omsorgstenestene er i utvikling, og det skjer endringar i måten vi løyser oppgåvene på. Samstundes veit vi også meir enn før om kva som gir god livskvalitet, meistring og tryggleik i kvardagen.
Denne kvelden ønskjer vi å gje eit godt og oversiktleg bilete av korleis kommunen arbeider med framtidas helsetenester. Målet er å gi deg innsikt i kva som er under utvikling – og kva moglegheiter som finst for å leve godt og trygt heime, også når helsa endrar seg.
Tema i programmet
- Korleis planlegg vi framtidas helsetenester i Stad kommune
- Tilbod innan demensomsorg
- «Bu trygt heime»
- Ein aktiv og meiningsfull kvardag i Stad kommune
- Panelsamtale med høve til spørsmål
Målet med samlinga er å gje innsikt, skape forståing, inspirasjon og rom for refleksjon. I panelsamtalen møtest fagpersonar, brukarar, pårørande, frivillige og beslutningstakarar for å dele erfaringar og lære av kvarandre.
Samlinga er delt i to delar, med pause midt i. Det blir servert kaffi og noko enkelt å bite i.
Påmelding
Arrangementet er gratis, men du må melde deg på. Det er fri plassering i salen (ingen setereservasjon).
Det er også mogleg å reservere billett ved å ringje Stad bibliotek på telefon 918 58 980. Billetten kan du hente i billettluka når du kjem.
Har du rullestol, må du ta kontakt for bestilling og reservasjon av plass på post@operahuset.no
Transport
Treng du transport til arrangementet?
Det er sett opp gratis transport frå Leikanger og Selje.
Påmeldingsfrist for transport:
Torsdag 4. juni.
Leikanger-Nordfjordeid-Leikanger (transport om Bryggja)
Avgang Leikanger (stoppestad Leikanger v/korsen) kl. 15.30.
Bryggja-Nordfjordeid-Bryggja
Påstigning Bryggja (stoppestad: Bryggja – v/grendahuset) ca. kl. 16.15.
Selje-Nordfjordeid-Selje (transport om Flatraket)
Avgang Selje (stoppestad: Selje – v/hamna/prestegarden) kl. 15.30.
Flatraket – Nordfjordeid-Flatraket
Påstigning Flatraket (stoppestad: Flatraket – v/skulen) ca. kl. 16.05.
Retur etter arr. kl 20.00.
Vi ønskjer alle velkomne!