Brannsjef i Stad kommune Geir Petter Hatlenes oppmodar alle om å sjekke brannvarslaren no i inngangen til desember.

I Stad kommune rykka brannvesenet ut til fire bustadbrannar i fjor.  Alle desse var einebustadar, i tillegg var det 3 brannhindranden tiltak på komfyr.

– Alle bustader og hytter skal ha røykvarslarar og du må ha minst éin varslar i kvar etasje. Alarmen skal kunne høyrast tydeleg på opphaldsrom og soverom, også når døra mellom romma er stengd, seier brannsjef i Stad kommune Geir Petter Hatlenes.

Røykvarslardagen er ei årleg landsomfattande kampanje og eit samarbeid mellom brann- og feiarvesenet, Det lokale eltilsyn, Norsk brannvernforening, Gjensidige og Direktoratet for samfunnstryggleik og beredskap.

Test røykvarslaren

Test røykvarslaren ved å halde ”test-knappen” inne nokre sekund. Røykvarslaren skal då byrje å pipe. Om han ikkje gjer det, må du byte batteri og gjenta testen, eventuelt kjøpe ny varslar. Om røykvarslaren gjev frå seg korte pip, vil det seie at batteriet byrjar å bli dårleg. Då må du byte batteriet med ein gong.

Bruk gjerne Røykvarslardagen til å hjelpe nokon som ikkje greier å teste eller byte batteri sjølv. Ein ny røykvarslar kan også vere ei fin førjulsgåve.

– Vi tilrår seriekopla røykvarslarar, slik at alle varslarane pip samstundes ved brann. Dette kan gje deg verdifull tid til å evakuere, til dømes om ein brann startar i kjellaren og du søv i andre etasje. Det kan vere med på å redde liv, seier Geir Petter.

Bør testast jamleg

Ein bør normalt byte røykvarslarar etter åtte til ti år. I rom med mykje støv og skit kan detektoren bli ustabil og gje falske alarmar, fordi sensoren blir skiten eller støvete. I slike miljø vil levetida til røykvarslaren vere kortare. Røykvarslarar er EE-avfall som ein ikkje skal kaste i søpla. Gamle røykvarslarar kan leverast gratis til forhandlarar og til din lokale attvinningsstasjon.

– Røykvarslarar bør ein teste jamleg og kvar gong du har vore bortreist over lengre tid, understrekar brannsjefen.

Ta ansvar for dine nærmaste

Brannstatistikken viser at nokre grupper er spesielt utsette og sårbare om det skulle oppstå brann. Dette er bl.a eldre og personar med nedsett funksjonsevne. 
- Mange av desse vil ha vanskeleg med å sjekke røykvarslarane sjølve, og vi oppmodar derfor alle som har moglegheit til å hjelpe dei ein kjenner som kan tenkast å slite med dette, avsluttar bransjefen.

På røykvarslerdagen.no finn du nyttig informasjon om tiltak som betrar branntryggleiken.

Kontaktperson:
Geir Petter Hatlenes, Brannsjef Stad kommune, geir.petter.hatlenes@stad.kommune.no