Prøvesvar måndag kveld viser at fire vaksne personar i Selje har fått påvist smitte med covid-19. Alle desse er nærkontaktar innanfor familiar med tidlegare smitta, og alle var i karantene. Ein av dei fire har testa positivt på hurtigtest og vil ikkje vere med i tala frå Helse Førde før svar på PCR-test også er klart tysdag kveld.
Måndag kveld viser også prøvesvar at ein vaksen person på Nordfjordeid har fått påvist smitte. Denne personen er nærkontakt i same husstand som ein tidlegare smitta. Personen var difor i karantene og smitteveg er kjent.
Til saman er det måndag påvist fem nye smittetilfelle. Alle som fekk påvist smitte måndag kveld var i karantene som nærkontakter til tidlegare smitta, og har soleis kjent smitteveg. Dette talar for at ein er på veg mot å få ytterlegare kontroll på utbrotet. Prøvesvar dei komande dagane vil avklare dette ytterlegare.
Arbeidet med oppfølging av nærkontaktar i karantene, gjenteken testing av desse og testing av alle personar med symptom på sjukdom, held fram. Det er måndag testa om lag 100 personar i Selje og 70 personar på Nordfjordeid.
Kommuneoverlegen vil tysdag morgon ferdigstille ei ny overordna risikovurdering av smittesituasjonen i samband med utbrotet. Denne vert gjort kjent tysdag.
Stad kommune oppfordrar alle innbyggjarar til å ha svært lav terskel for å teste seg ved symptom på sjukdom.
Symptom på koronavirus kan vere:
- Sår hals
- Hoste
- Tett eller rennande nase
- Hovudverk
- Feber
- Influensafølelse eller sjukdomsfølelse
- Kroppsverk
- Tungpust
- Tap av smak- eller luktesans
Vi anbefaler at også barn med nyoppståtte symptom det siste døgnet bør testast.