Utbygginga skal i hovudsak skje innan utgangen av 2022, og har ei samla kostnadsramme på 12,4 mill NOK.Utbygginga skal i hovudsak skje innan utgangen av 2022, og har ei samla kostnadsramme på 12,4 mill NOK. Utbygginga vil gje høghastigheitsbreiband til ca. 250 husstandar og mange fritidsbustader i bygdene som no får breiband.
- Med denne nye avtalen kjem vi eit langt steg vidare mot målet om breiband i heimen til alle som bur i Stad kommune, seier ordførar i Stad Alfred Bjørlo. – Stabilt og godt breiband er viktig for dei som bur i bygdene for både arbeid, fritid og utdanning - og heilt nødvendig for å legge til rette for vidare vekst og utvikling i bygdene. Breibandsutbygging er eit stort økonomisk løft for Stad kommune, men vi meiner det er ei framtidsretta investering i bulyst og vekst i heile kommunen vår.
- Vi set stor pris på den tilliten Stad kommune viser oss ved å inngå avtale for utbygging av dei nye fiberområda i kommunen, seier Salssjef strategiske kundar og utviding av dekningsområde i Enivest, Ole Ingar Haaland. Dette vil sikre innbyggjarane tilgang til eit stabilt og robust fibernett for framtida. Det siste året har vist oss kor viktig tilgang til godt internett er, med tanke på heimeskule og heimekontor. Kommunen har gjort ein solid jobb med å forberede prosjektet, og Enivest er no i gang med planlegging. Dei fleste av kundane er planlagt levert innan utgangen av 2022.
Utbygginga er finansiert i ein kombinasjon av statlege breibandsmidlar prioritert til prosjekta i Stad av Vestland fylkeskommune, kommunale investeringsmidlar, privat medfinansiering frå abonnentane og eigeninvestering frå Enivest som leverandør.
Det pågår for tida også breibandsutbygging i regi av Enivest mange andre stader i Stad kommune: I Eidsbygda (områda mellom Nordfjordeid og Hornindalsvatnet, pluss austover mot Nes/Skaugset og vestover mot Os/Taklo), i Hjelmelandsdalen, på Liset i Selje og området Nordpollen-Barmen.
Alle desse utbyggingane skal vere ferdigstilt i løpet av 2021.
- Stad kommune vil no i samarbeid med Vestland fylkeskommune også lyse ut anbod på breibandsutbygging i Kjølsdalen og bygdene vest for Kjølsdalen (Haus, Ervik, Midthjell), Rimstaddalen på Bryggja og nokre gjenståande område i Selje (Røyseth, Eltvik, Selja). I tillegg blir det arbeidd med å finne økonomisk akseptable løysingar for breiband til Drage og Hoddevik, opplyser prosjektleiar Svein Otto Melheim i Stad kommune.
- Med den systematiske måten vi no arbeider på, godt samarbeid med Vestland fylkeskommune og stor oppslutnad blant dei som bur i bygdene som får tilbod om breiband, ser vi det som mulig å ha full breibandsdekning i heile Stad kommune seinast i 2023, seier ordførar Alfred Bjørlo og prosjektleiar Svein Otto Melheim.
Kontaktinformasjon:
Ole Ingar Haaland, Enivest, mobiltlf 970 54 373
Svein Otto Melheim, Stad kommune, mobiltlf 911 38 974
Alfred Bjørlo, Stad kommune, mobiltlf 480 82 652