Stad kyrkjelege fellesråd arrangerer kvart år messe søndagen nærast 8. juli, som er dagen for den historiske feiringa til minne om Sta. Sunniva. I år blir dette søndag 6. juli kl 12.00 i klosterruinane på Selja. Gudsteneste har eit økumenisk preg, og det blir oppfordra til messefall i heile Nordfjord prosti.
Seljumannamessekomiteen som er sett ned av fellesrådet består av representantar frå alle sokneråda i Stad. I tillegg til messa på søndagen har komiteen også ansvar for å arrangere ei framsyning i Selje kyrkje laurdag kveld. I år blir det première på framsyinga “Sunniva av Selja” skrive av Håvard Sand og Sara Lepsøe, med Arild Stav som musikalsk ansvarleg, i samarbeid med organist i Selje, Jon Inge Sigerland. Dette er ei reise i Noregs historie i tonar, ord og bilete. Det blir også ei lansering av undgomsboka “Sunnivas reise” av Sara Lepsøe i Selje prestegard laurdag kl 14.00.
I tillegg blir det fleire andre arrangement i Selje og på Selja. Laurdag arrangerer Fjordly ungdomssenter Bøn frå Selja, og kl 12.00 går båten for dei som vil vere med på katolsk messe med prosesjon frå Bø til klosterruinane. Måndag ettermiddag er det katolsk feiring i Selje presetegard med foredrag av professor Henning Laugerud, og vigile i Sunnivahellaren på Selja.
På sjølve helgendagen 8. juli blir det første ortodoks messe i Selje kyrkje kl 08.00 og deretter prosesjon til messe i Sunnivahellaren. Kl 11.30 blir det katolsk messe i klosterruinane med nyinnset biskop for Oslo katolske bispedøme, Fredrik Hansen.
Selje pilegrimssenter har ope i Selje prestegard alle dagar mellom kl 09.00 og 16.00, med sal av både vaflar og pilegrimssuppe, og det blir utsal av lokale handverksprodukt.
Klosterbåten set opp ekstra ruter alle dagar, og legg ut oppdaterte avgangstider til Selja på nettsida www.fjordguidingselje.no.
Oppdatert program for alle arrangementa finn du på Selja kloster si nettside.
Noregs eldste pilegrimsmål og helgenfeiring
Selje og Selja har ein unik plass i norsk historie. Her finn vi landets første pilegrimsmål heilt tilbake til 900-talet. Med utgangspunkt i legenda om den irske kongsdottera Sunniva og følgjet hennar som rømde over havet og stranda her, vart det etablert både kyrkjer, bispesete og kloster på Selja på 900- og tidleg på 1000-talet.
Seljumannamesse 8. juli er ei av dei eldste kristne høgtidene våre, og vart fastsett av Olav Haraldson i Kristenretten i 1024. Vi finn Seljumannamesse omtala i Gulatingslova og dei eldste landskapslovene som messe til dei heilage som kviler i Selja og Kinn, Seljuvaka og Seljumannavaka. Dette var ein av dei største festdagane i året, og vart feira både i Noreg og andre nordiske land. På Selja, Kinn og i Bergen var dette store messer med mange tilreisande pilegrimar.
Helgenfeiringane i det protestantiske Noreg tok slutt etter reformasjonen, og både klosteret og helgenanlegget på Selja forfall i fleire hundre år. Men på 1800-talet tok interessa for klosterruinane seg opp igjen. Både forskarar og lokalbefolkning begynte å besøke ruinane på Selja, og folk tok til å halde det som på folkemunne vart kalla "Seljemysse". Dette var protestantiske utegudstenster, og ikkje helgenmesser som i katolsk tid. Det har vore sporadiske messer også 1900-talet, mellom anna under det store restaureringsprosjektet på 1930-talet.
Andre verdskrig sette ein mellombels stoppar for feiringane på øya, og først i 1977 tok sokneprest Erling Nerheim opp att tradisjonen med å feire Seljumannamesse i klosterruinane. Sidan har det vore ei årleg messe her søndagen nærast 8. juli. Fleire biskopar og kjende personar har leia messene på Selja, og det har i tillegg vore konsertar og kulturarrangement i Selje sentrum.
Alle er velkomne til årets feiring på Selja!