Stad kommune sitt årsbudsjett for 2026 og økonomiplan for perioden 2026-2029 er i år levert 
i balanse. Budsjett og økonomiplan byggjer på rammene og innsparingskravet for kommunalområda som vart fastsett av Stad kommunestyre i møtet 11. september 2025.

Kommunen vart i februar 2025 meldt inn i Robek-registeret fordi vedteken økonomiplan for perioden 2025-2028 var i ubalanse. Det var udekte driftsunderskot i åra 2026-2028 medan drifta for 2025 og delar av 2026 var planlagt finansiert ved å bruke opp heile kommunen sitt disposisjonsfond. Stad kommunestyre har hatt som målsetnad å få balanse i ny økonomiplan, og kommunedirektøren har følgt dette opp. 

Som vedlegg til budsjett 2026 og handlingsprogram 2026-2029 ligg Stad kommune sin tiltaksplan, som kommunen har plikt til å lage som Robek-kommune. Tiltaksplanen konkretiserer korleis kommunen skal nå innsparingskravet for 2026 samtidig som den i korte trekk peikar på kva som må til av endring og innsparing for å kunne nå dei økonomiske måltala i økonomiplanen.

- Eg vonar at Stad kommune sin konkrete og balanserte økonomiplan no gjev grunnlag for utmelding av Robek-registeret, seier kommunedirektør i Stad Kristine Dahl.

Året som snart ligg bak oss har vore eit spesielt og krevjande år for Stad kommune. Månadane har vore prega av store omstillings- og endringsprosessar, og desse må halde fram også dei komande åra. Trass store økonomiske innsparingar i åra framover, vil driftsutgiftene for kommunen framleis vere høgare enn driftsinntektene gjennom heile økonomiplanperioden. Noko av drifta må såleis finansierast over kommunen sitt disposisjonsfond, som gradvis vil bli tømt dei komande åra. I tillegg til økonomisk stram driftsstyring, må kommunen sine investeringar haldast på eit så lågt nivå som mogleg i åra som kjem, avsluttar Dahl. 

Både finansutvalet og formannskapet har no fått tilsendt den politiske saka, som er å finne på kommunen si heimeside under møteplan og sakspapir.

Budsjett 2026 og handlingsprogram 2026-2029