Alle kommunar kan bli ramma av hendingar som kan gjere stor skade på menneske, miljø og eigedom. 

Samfunnsviktige funksjonar som helse, vatn eller straumforsyning er sårbare for ekstraordinære belastningar. Ved å førebu seg på å handtere slike hendingar, kan kommunen redusere konsekvensen betydeleg.

Dette gjer vi gjennom beredskapsordningar, ved å arrangere eller delta på øvingar og å utarbeide risiko- og sårbarheitsanalysar (ROS-analysar) for ulike scenario.

For å kunne reagere rasjonelt og effektivt i kritiske situasjonar har kommunen utarbeidd eit beredskapsplanverk for å handtere kriser, ulukker og katastrofar. Planverket består av ein overorda plan samt planar og rutinar for dei enkelte delane av den kommunale verksemda.

Stad kommune har etablerte vaktordningar innan vatn, avløp og overvatn, veg, vaktmester, brann, brøyting og legetenester. Desse beredskapsordningane tek i vare den daglege beredskapen i kommunen. Dersom det skjer alvorlege hendingar kan den kommunale beredskapsleiinga bli varsla.

Ved alvorlege ulukker og hendingar er det alltid brann og/eller politi som handterer den akutte fasen. Beredskapsleiinga kan bli kontakta dersom det er behov for støtte og koordinering av innsatsen.

Kommunen si beredskapsleiing består av:

• Ordførar
• Kommunedirektør
• Medlemmane av kommunedirektøren si leiargruppe (kommunalsjefane)
• Leiarane for stabseiningane (personal og kommunikasjon, strategi og samordning)
• Kommuneoverlege
   

Kommunen sin beredskapsleiing vil, avhengig av typen hending, bli forsterka med representantar frå samarbeidande etatar og verksemder, som til dømes politi eller brannvesen.

Kommunen sitt psykososiale kriseteam har som formål å vere tilgjengeleg for dei som har behov for psykososial støtte og omsorg ved større ulukker og alvorlege hendingar som involverer éin eller fleire av kommunen sine innbyggjarar og dei som elles oppheld seg i kommunen.

Kommunen sitt psykososiale kriseteam er eit tverrfagleg samansett team samanset av fagpersonar frå ulike einingar i kommunen. 

Stad kommune har samfunnsmålet: «Stad er eit livskraftig og trygt samfunn der vi alle dreg i lag». Eit trygt samfunn er ein føresetnad for at folk skal ønske å bu og at næringslivet skal drive si verksemd i kommunen. For å oppnå tryggleik, må vi arbeide systematisk med å redusere sannsynet for at uønskte hendingar skjer. Stad kommune skal i størst mogleg grad ha ein beredskap som kan handtere uønskte hendingar den dagen dei skjer.

Ei overordna heilskapleg risiko- og sårbarheitsanalyse (ROS-analyse) er ei kartlegging av ulike uønskte hendingar med potensielt store konsekvensar, som vi ser føre oss kan skje i kommunen vår. Analysen fastset sannsynet for at ulike hendingar kan skje og kva konsekvensar vi kan få dersom dei skjer. Dei ulike delanalysane vil saman skape eit risikobilete som indikerer kva hendingar vi bør dimensjonere beredskapen for. 

Ein viktig del av ROS-analysen, er at den kjem med framlegg til førebyggande og konsekvensreduserande tiltak. Ei overordna risiko- og sårbarheitsanalyse er ei grovanalyse og dermed ikkje eit fasitsvar på kva som kan skje i kommunen.