– Vi ynskjer å setje fokus på at rusproblem og psykiske plager er å forstå som normale reaksjonar på vanskar alle kan oppleve i livet, seier avdelingssjef ved Nordfjord psykiatrisenter Trond F. Aarre. 

Målet med ein slik kveld å opplyse om korleis tenestene innan psykisk helse og rus er organisert og korleis ein kan nytte dei på best mogeleg måte når ein treng det. – Det vil også handle om korleis ein sjølve kan meistre den type utfordringar og møte dei som strevar, fortel Aarre.

Relevant for alle

Kvelden er open for alle som vil. – Temaet er noko som gjeld oss alle og som er viktig å vere open om, seier Oda Brendehaug. Ho er ein av to erfaringskonsulentar som er tilsett ved Nordfjord psykiatrisenter. Ein erfaringskonsulent er ein person som sjølv har vore i behandling, men som no kan nytte sine erfaringar til å hjelpe tenestene til å bli betre. – Det å ha i stillingsinstruksen at ein skal skape håp tykkjer eg er heilt fantastisk, seier Monica Vederhus Krabbestig som også er erfaringskonsulent. – Det å få informasjon og kunnskap kan vere nøkkelen til å betre hjelpe seg sjølv og andre, legg dei til.  

Samarbeid mellom kommune og helseføretak

Kommuneoverlege Thomas Vingen Vedeld vil saman med Trond F. Aarre leie kvelden som inneheld innlegg av representantar for tenestene ved Nordfjord psykiatrisenter og i kommunehelsetenesta i tillegg til erfaringskonsulentane. Til å ynskje velkomen kjem kommunedirektør i Stad kommune og direktør for psykisk helsevern i Helse Førde. – Vi ynskjer alle hjarteleg velkomne til Operahuset denne kvelden og håpar den kan vere opplysande, avsluttar Aarre.