Bakgrunn
Barnehagelova fastset at kommunen har plikt til å tilby plass i barnehage til alle barn i kommunen med rett til plass. Kommunen har lokalt barnehagemynde og skal sjå til at dei kommunale og private barnehagane blir drivne i samsvar med gjeldande regelverk. Agenda Kaupang konkluderer (s. 6) i rapporten med at Stad har effektive barnehagar, med middels kvalitet og låge kostnadar.
Kostnadsnivået i barnehagetenesta er lågare enn gjennomsnittet som ein samanliknar seg med. Stad har høg dekningsgrad, store kommunale barnehagar og høg produktivitet.
Når det gjeld bygg, vert det peika på at Stad har fleire bygg med alvorlege funksjonelle manglar. Det generelle biletet er gamle og nedslitne barnehagar som treng vedlikehald og modernisering av tekniske anlegg. Modernisering av dagens barnehagar er anslått å koste 86 mill. kroner. Det er viktig å no få fastsett ein langsiktig føreseieleg plan for både vidare drift og vedlikehald av dei kommunale barnehagane. Dersom ein skal klare å redusere kostnadsnivået til Stad kommune må ein vurdere å ta ned tal kommunale bygg.
I program for berekraftig økonomi gjeld dette no konkret: Vurdere avvikling av Haugen barnehage.
Det kommunale «Kunnskapsgrunnlag – vedlikehald av formålsbygg» seier under tiltaksplanen for barnehagebygg (s. 22) at Haugen barnehage treng totalrenovering.