8. mai er dagen for å heidre alle veteranar, og veteranfamiliar, frå andre verdskrigen og fram til dei internasjonale operasjonane i dag. Etter andre verdskrigen har over 100 000 nordmenn tenestegjort i nesten hundre ulike internasjonale operasjonar i over 40 land i fire verdsdelar.

I sentrum for den lokale markeringa på Nordfjordeid står Sørgende Mor, minnesmerket over dei falne i 2. verdskrigen frå Nordfjord. Varaordførar i Stad, Siri Sandvik vil halde tale for dagen. Også Norsk Reserveoffiserforening (NROF) avdeling Nordfjord v/Frode Fagerli, Tysklandsbrigaden v/Lasse Solheim og Stad HV område v/Håvard Tandstad held appellar.  

8. mai er også den internasjonale Røde Kors dagen vert markert med appell frå Eid Røde Kors. Denne vert i år halden av Thomas R. Brekke. Eid Musikklag står tradisjonen tru føre den musikalske delen av markeringa.

Arrangementet startar med opptog/ defilering frå Eid kyrkje, gjennom gata, til markeringa på Eksersisplassen. I forkant av markeringa har mange lag, foreiningar, Malakoff Rockfestival, Eidarussen 2023 og engasjerte einskildpersonar lagt ned eit stort antall dugnadstimar for å gjere Eksersisplassen klar til frigjerings- og veterandagen og alle dei andre arrangementa som skal vere der denne sommaren.

Dette omfattande dugnadsarbeidet er leia av Plassens Venner. Det er også Plassens Venner som står føre den trivelege festen etter markeringa ved Sørgande Mor. I og ved dei gamle husa på Eksersisplassen vil det vere festdekka bord for sosialt samvere. Alt ligg til rette for ei flott markering i vakre omgjevnader.

Arrangørane reknar med at mange store og små vil bli med å markere frigjerings- og veterandagen. Vel møtt!

Arr. Nordfjordrådet, Plassens Venner og Eid Røde Kors

Programmet for markeringa ser slik ut:

kl. 17.30-17.40          Oppstilling til tog ved Eid kyrkje

kl. 17.40                    Toget går frå Eid kyrkje, gjennom Eidsgata, til Plassen

kl. 18.00                    Arrangement ved Sørgende Mor

                                 Helsingar, markering av Røde Kors dagen

ca. kl. 18.45              Festsamvere i husa på Plassen

                                  Sal av mat og kaffi, lotteri til inntekt for Plassens Venner.