Offentleg ettersyn

Offentleg ettersyn skal sikre at offentlege organ, naboar, interesseorganisasjonar og andre får høve til å uttale seg om planforslaget før endeleg vedtak.

Planforslaget

Plankart til tredje høyring - Detaljregulering for Stad molo og Leikanger indre hamn

Målet med reguleringsplanen er å skape ei trygg hamn og vern mot havet for tettstaden Leikanger, og legge til rette for nærings- og kaiareal for eksisterande og framtidige interessentar som treng tilgang til sjø. 

Reguleringsplanen har vesentlege verknadar for miljø og samfunn og det er derfor utarbeidd konsekvensutgreiing for tiltaka i planen, i samsvar med plan- og bygningslova § 4-2 og Forskrift om konsekvensutredninger.

Planforslaget legg til rette for utfylling i sjø til næringsareal, moloar og hamner/kaier ved Leikanger, som skal dekke behovet for fiskerihamn, utskiping av varer og offentleg transport via sjø. Moloarmane skal fungere som reine bølgjebrytarar utan ferdsel. 

I tillegg vert strandsona mellom Stave og Kvia og noko av strandsona på Sjåstad regulert som ein del av planen (naust, spreidd busetnad, bustad og fritidsbustad).

Planprosessen og endringar i planforslaget

Planprosessen og endringane er oppsummert i saksframlegget (sak F-25/023) og går elles fram av planomtalen. I revidert planforslag til tredje høyring er det teke utgangspunkt i eit redusert utbyggingsalternativ der nordre moloarm er flytta om lag 500 m nærare Leikanger sentrum (til Kvia).  Næringsareal ved Sjåstad er i større grad enn før tilpassa eksisterande og regulert næringsareal i Stad næringspark, og det er lagt inn ein sørvendt molo for fiskerikai på Sjåstad. 

Ynskjer du meir informasjon?

Du finn saksframlegget, plandokumenta og andre høyringsdokument her:

25/1185 - Tredje høyring og offentleg ettersyn - Detaljregulering for Stad molo og Leikanger indre hamn - Høyringsfrist 27.04.2025

Dersom du ønskjer ei utskrift av eitt eller fleire av dokumenta, kan du ta kontakt med Stad kommune på tlf. 57 88 58 00.

Merknader til planforslaget

Du har høve til å kome med skriftleg uttale til planforslaget, til dømes om arealbruk, omsyn eller andre relevante opplysningar. Uttale skal merkast med arkivsaksnr. «25/1185», og kan sendast via skjema på kommunen sine heimesider eller post til Stad kommune, Rådhusvegen 11, 6770 Nordfjordeid.

Frist for å kome med uttale er sett til 27. april 2025.

Vidare planprosess

Når høyringsfristen er ute, vil kommunedirektøren samanfatte innkomne uttaler og vurdere desse før planforslaget vert lagt fram for sluttbehandling og vedtak. Berørte naboar og grunneigarar vil få tilsendt kunngjering etter vedtak.